Ndalimi i shqiptarit në SHBA, nis peticioni, kërkohet ndërhyrje e menjëhershme për Alex Nilajn

Themeluesi i organizatës bamirëse “Open Hand” u ndalua nga autoritetet amerikane të emigracionit. Komuniteti kërkon lirimin e tij, ndërsa pezullimi i shpërndarjes së ushqimeve rrezikon të lërë mijëra persona pa ndihmë.
 
Ndalimi i shqiptarit Alex Nilaj nga autoritetet amerikane të emigracionit ka nxitur reagime në komunitetin e Bronxit, në Nju Jork, ku ai prej vitesh drejton një organizatë bamirëse që ndihmon familjet në nevojë.

Pas ndalimit të tij, ka nisur një peticion që kërkon lirimin e Nilajt dhe rikthimin e tij në krye të organizatës “Open Hand Food Pantry”, e cila shpërndan ushqime për mijëra persona çdo muaj.

Sipas raportimeve të mediave amerikane, Nilaj u ndalua më 13 tetor 2026, pasi u paraqit në një seancë në gjykatën e emigracionit në Manhattan. Më pas, ai u transferua në qendrën e ndalimit Delaney Hall, në Nju Xhersi.

Ndalimi i tij ka shkaktuar shqetësim te banorët dhe vullnetarët që bashkëpunonin me organizatën, pasi shpërndarja e ushqimeve është pezulluar. Qendra u shërbente rreth 7.000 deri në 8.000 personave në muaj, mes tyre familjeve me të ardhura të ulëta dhe të moshuarve.

Vullnetarët kanë paralajmëruar se pa Nilajn organizata e ka të vështirë të vijojë punën, duke ngritur shqetësime për mijëra persona që mbështeten te ndihma e saj.

Në mbështetje të shqiptarit është angazhuar edhe kongresmeni amerikan Ritchie Torres, i cili ka kërkuar lirimin e tij. Torres e ka cilësuar Nilajn një drejtues komuniteti që ka ndihmuar shumë familje dhe ka ngritur shqetësime për situatën e tij gjatë ndalimit.

Ndërkohë, autoritetet amerikane kanë dhënë një tjetër version lidhur me çështjen. Departamenti i Sigurisë Kombëtare (DHS) deklaron se Nilaj hyri në Shtetet e Bashkuara më 1 tetor 2006 me leje të përkohshme, por qëndroi edhe pas skadimit të afatit. Sipas autoriteteve, ndaj tij ishte nxjerrë një urdhër largimi nga një gjyqtar i emigracionit më 22 korrik 2008.

Pra, çështja lidhet me statusin e tij të emigracionit, ndërsa raportimet e mediave amerikane nuk bëjnë të ditur akuza të tjera penale ndaj tij.

Ndërsa peticioni për lirimin e shqiptarit vijon të marrë mbështetje, komuniteti pret zhvillimet e mëtejshme ligjore. Në të njëjtën kohë, pezullimi i aktivitetit të organizatës bamirëse ka lënë të pasigurt vijimin e ndihmës ushqimore për mijëra persona në Bronx.