UGANDË/ Autoritetet mbyllin internetin përpara zgjedhjeve

Uganda ka mbyllur internetin dhe aksesin në media të ndryshme sociale përpara zgjedhjeve parlamentare dhe presidenciale – të cilat do të mbahen nesër – për të parandaluar përhapjen e dezinformatave, thanë sot autoritetet.

Shërbimet e mesazheve kanë qenë gjithashtu të bllokuara që nga mbrëmja e djeshme në vendin e Afrikës Lindore

Zyrtarët thanë se masa ishte një rekomandim nga shërbimet e sigurisë.

Por, aktivistët e të drejtave të njeriut thanë se qeveria po krijonte një klimë frike.

“Kemi parë policinë dhe ushtrinë që rrahin njerëz thjesht sepse qëndrojnë në rrugë dhe u bëjnë me dorë kandidatëve presidencialë nga opozita”, tha aktivisti i të drejtave të njeriut nga Uganda, Agather Atuhaire.

“Të gjithë në Ugandë jetojnë me frikë. Këto janë zgjedhje që i bëjnë njerëzit të kenë frikë të shkojnë të votojnë. Këto zgjedhje nuk do të jenë të lira dhe të ndershme”, tha ai.

Disa ditë më parë, disa organizata joqeveritare u detyruan të kufizonin aktivitetet e tyre për shkak të shkeljeve të dyshuara të interesave kombëtare.

Ato përfshijnë një organizatë gazetarësh, një organizatë monitorimi zgjedhjesh dhe grupe të të drejtave të njeriut.

Presidenti 81-vjeçar i Ugandës, Yoweri Museveni, kandidon për një mandat të shtatë. Ai e ka udhëhequr vendin që nga viti 1986.

Midis tetë kandidatëve, ish-muzikanti 43-vjeçar Robert Kyagulanyi, i njohur me emrin artistik “Bobi Wine”, shihet si rivali më i fortë i Museveni.

Megjithatë, gjatë fushatës, ai u përball me kufizime të shumta në aktivitetet e tij.

“Forcat e sigurisë penguan vazhdimisht ngjarjet e fushatës ose i shpërndanë ato duke përdorur gaz lotsjellës”, raportoi “Amnesty International”.