Shkopi 112 centimetra iu ngul në trup gjatë ngjitjes në mal, infermieri ecën 6 orë në këmbë për të mos paguar helikopterin

Një alpinist amerikan ka përjetuar një situatë të pazakontë dhe të rrezikshme gjatë ngjitjes në malin më të lartë të Montanës, pasi u rrëzua dhe u shpua nga shkopi i tij i ecjes. David Cifaldi, 32 vjeç, po kalonte pllajën e njohur si “Froze-to-Death Plateau” së bashku me dy miq, kur shtylla metalike i depërtoi në trup.

Shtylla prej çeliku, rreth 112 centimetra e gjatë, kaloi përmes lekurës poshtë krahut të majtë dhe doli nga shpina, por fatmirësisht nuk preku organe jetësore. Cifaldi, i cili punon si infermier në një spital në Billings, vendosi se mund të largohej vetë nga mali, duke shmangur një ndërhyrje me helikopter, për të shmangur koston e lartë të një ndërhyrjeje me helikopter.

Pas komunikimit me autoritetet përmes një pajisjeje satelitore, ai dhe shokët e tij nisën zbritjen e vështirë. Grupi përshkoi rreth 16 kilometra në më shumë se gjashtë orë, duke zbritur afro 1500 metra lartësi, ndërsa shtylla vazhdonte të ishte e ngulur në trupin e tij.

Ngjarja ka shkaktuar reagime të shumta në rrjetet sociale. Shkencëtari amerikan i shëndetit publik Eric Liang Feigl-Ding reagoi duke e përdorur rastin si shembull të kostove të larta të kujdesit shëndetësor në SHBA. Ai shkroi se askush nuk dëshiron të rrezikojë humbjen e të ardhurave të një viti të tërë për një shpëtim me helikopter dhe theksoi se “kostoja e kujdesit shëndetësor është tepër e lartë”.

Ekipet e kërkim-shpëtimit ndoqën lëvizjet e grupit dhe komunikuan me ta gjatë gjithë rrugës. Kreu i ekipit të shpëtimit në qarkun Stillwater, Ty Williams, tha se Cifaldi ishte i vetëdijshëm për gjendjen e tij dhe kishte vendosur të mos kërkonte evakuim, ndaj autoritetet respektuan zgjedhjen e tij.

Pasi mbërritën në automjet, miqtë e dërguan fillimisht në një klinikë, por mjekët e drejtuan për trajtim më të specializuar në spitalin St. Vincent Regional Hospital në Billings. Aty mjekët i hoqën shtyllën, i trajtuan plagën dhe pak ditë më vonë ai u rikthye në punë.

Cifaldi deklaroi se do të merrte të njëjtin vendim edhe në të ardhmen, duke theksuar se prania e dy miqve me përvojë dhe mundësia për të kontaktuar shpëtimin në rast përkeqësimi e bënë të mundur këtë dalje të rrezikshme nga mali.