Origjina e Covid-19, dalin pamjet e lakuriqëve të natës brenda laboratorit të Wuhan (Video)

Teksa shkencëtarët po punojnë për të gjetur origjinën e Covid-19, "Sky News" për Australinë publikoi të martën pamje ekskluzive brenda Institutit të Virologjisë të Whanit, qytetit ku në fundin e 2019-ës u zbuluan rastet e para të infektimit.

Në pamje duken shkencëtarët duke studiuar e duke ushqyer me krimba lakuriqët e natës brenda ambienteve të laboratorit në maj 2017. Teza se sëmundja u përhap nga lakuriqët është hedhur edhe nga Organizata Botërore e Shëndetësisë, por pas hetimeve në terren ekipet e ekspertëve e përjashtuan skenarin që kjo të kishte ndodhur brenda laboratorit kinez.

Në kronikën e televizionit australian pretendohet se Instituti i Wuhanit menaxhonte një databazë me 15 deri 17 mijë mostra lakuriqësh nate, por ajo databazë u zhduk papritur nga faqet e internetit në shtator të 2019-ës, pak muaj përpara shpërthimit të epidemisë së përgjithshme.

Një nga ekspertët e ekipit të caktuar nga OBSH-ja tha këtë muaj se kur kishin vizituar Institutin e Wuhanit, nuk e kishin pyetur a mbanin lakuriqës për studim sepse kjo do të ishte gjë normale për laboratorë të kalibrit si ai kinez.

Në samitin që u mbajt fundjavën e shkuar, liderët e 7 vendeve më të zhvilluara në botë kërkuan një hetim transparent, të udhëhequr nga ekspertë dhe të bazuar në shkencë, dhe të vlerësojnë edhe një herë konkluzionet paraprake të OBSH-së në lidhje me origjinën e Covid-19./oranews