"Kam ngecur", zbulohen detaje nga krimi në Dubai! Çifti rus u zhdukën pasi do takonin "investitorë", MESAZHI i fundit...

Një ngjarje tronditëse ka ndodhur në Emiratet e Bashkuara Arabe, ku një çift rus u rrëmbye dhe u vra brutalisht pas një takimi të gënjeshtërt me pretendimin për investitorë. Viktimat janë Roman Novak, 38 vjeç, dhe bashkëshortja e tij Anna, të cilët jetonin prej vitesh në Dubai dhe shfaqnin një jetë luksoze në rrjetet sociale me makina sportive dhe udhëtime me avionë privatë.

Çifti u zhduk një muaj më parë pasi udhëtuan drejt resortit malor Hatta. Sipas hetimeve, shoferi i tyre personal i kishte dërguar deri në një parking pranë liqenit, ku më pas ata u transferuan në një tjetër automjet. Pak çaste para se të humbnin kontaktet, Roman Novak dërgoi një mesazh alarmant: “Kam ngecur në male, pranë kufirit me Omanin, më duhen urgjentisht 152 mijë paund.” Pas këtij mesazhi, komunikimi u ndërpre.

Trupat e çiftit u gjetën më vonë të copëtuara dhe të varrosura në një zonë shkretëtire. Hetuesit kanë identifikuar tre të dyshuar rusë, përfshirë një ish-hetues vrasjesh dhe dy ish-luftëtarë nga lufta në Ukrainë. Ata dyshohet se kanë rrëmbyer çiftin për të marrë fjalëkalimin e portofolit të kriptomonedhës së Novakut, por ky i fundit rezultoi bosh.

Mediat ruse raportojnë se Novak ishte nën hetim për mashtrime me kripto që kapnin shifrën e 38 milionë paundëve. Pas vrasjes së tij, fëmijët e çiftit janë marrë në kujdestari nga prindërit e Annës. Autoritetet e Dubait dhe ato ruse po punojnë për të zbardhur plotësisht ngjarjen dhe për të siguruar drejtësinë për viktimat.