BBC pasqyron situatën e protestave në Shqipëri: Përshkallëzohen përplasjet mes protestuesve dhe policisë

Protesta e studentëve kundër qeverisë dhe kryeministrit Edi Rama në Shqipëri ka tërhequr vëmendjen e medias britanike BBC, e cila i ka kushtuar një raportim zhvillimeve të fundit në Tiranë.

BBC raporton për përshkallëzimin e protestave, ku demonstruesit kanë hedhur gurë dhe bomba molotov në drejtim të policisë, ndërsa efektivët janë kundërpërgjigjur me autobotë uji.

“Protestat kanë shpërthyer sërish në Shqipëri, ku demonstruesit kanë hedhur bomba molotov dhe gurë drejt policisë, e cila është përgjigjur me autobotë uji”, shkruan media britanike.

Në artikull theksohet se përplasjet e fundit janë pjesë e një vale protestash kundër qeverisë, të cilat vijojnë prej javësh dhe organizohen nga studentët, që kërkojnë dorëheqjen e kryeministrit Edi Rama.

Raportimi i BBC-së i shtohet pasqyrimit të protestave në Shqipëri nga mediat ndërkombëtare, ndërsa tubimet dhe përplasjet në rrugët e Tiranës vijojnë të tërheqin vëmendjen e opinionit publik jashtë vendit.