Zbulohet një lokal i përshtatur për lojëra fati në Tiranë, arrestohet administratori dhe 2 klientë

Efektivët e policisë kanë ushtruar kontrolle në disa zona të kryeqytetit me qëllim goditje e lojërave të fatit.

Gjatë këtij aksioni u arrestuan 3 persona, mes tyre edhe administratori i një lokali ku luheshin lojëra fati. Gjithashtu, janë sekuestruar 5 makineta, 4 celularë dhe 50 000 lekë.

Siç bën me dije policia, nga kontrollet në lokalin në rrugën “Petro Nini Luarasi”, u konstatua se ambienti ishte përshtatur me makineta dhe me celularë, që shërbenin për lojëra fati dhe për vënien e basteve sportive.

Njoftimi:

Tiranë/Finalizohet operacioni policor i koduar “Rezultati”.

Zbulohet një lokal në rrugën “Petro Nini Luarasi”, ku luheshin lojëra fati me makineta dhe me celularë.

Arrestohen 3 shtetas (administratori i lokalit dhe 2 klientë).

Sekuestrohen 5 makineta, 4 celularë dhe 50 000 lekë.

Si rezultat i kontrolleve të mbështetura tek inteligjenca policore, me objektiv goditjen e organizimit të kundërligjshëm të lojërave të fatit, Komisariati i Policisë Nr. 1, në bashkëpunim me Sektorin për Hetimin e Krimeve Kibernetike, finalizoi operacionin “Rezultati”.

Gjatë operacionit u arrestuan në flagrancë shtetasit M. D., 21 vjeç, A. Z., 24 vjeç dhe Xh. Gj., 21 vjeç.

Nga kontrollet në lokalin që administronte shtetasi M. D., u konstatua se ambienti ishte përshtatur me makineta dhe me celularë, që shërbenin për lojëra fati dhe për vënien e basteve sportive. Në lokal u kapën në flagrancë, duke luajtur, 2 të arrestuarit e tjerë.

Materialet procedurale iu referuan Prokurorisë së Tiranës, për veprime të mëtejshme.