VIDEO/ Rrahu për vdekje 58-vjeçarin grek, historia e dhunshme e autorit shqiptar! Ekspertët gjejnë dhe shenja mbytjeje...

Ndaj 29-vjeçarit shqiptar, i cili rrëfeu se kishte rrahur për vdekje 58-vjeçarin grek në zonën e Neos Kosmos të Athinës, u ngrit ndjekje penale për krimin e vrasjes me dashje në gjendje të qetë mendore.

Rasti është tronditës në detaje, pasi hetimi mjeko-ligjor tregoi se tek i ndjeri kishte edhe gjurmë mbytjeje, edhe pse i dyshuari e mohoi që të kishte qëllim vrasjen.

Sipas hetuesve, autori kishte edhe njohuri të mira të arteve marciale, teksa pamjet e kamerave të sigurisë e kapën në momentin e sulmit ku grushton pa ndërprerje për disa herë viktimën.

29-vjeçari shqiptar e goditi pa mëshirë kokën e viktimës së tij me forcë në timonin e makinës kur e sulmoi, ndërsa është e mundur që ai të ketë tentuar edhe ta mbytë. Por nuk përjashtohet që si pasojë e goditjeve, viktima të ketë pësuar edhe atak kardiak.

Më parë, 58-vjeçari fatkeq kishte humbur kontrollin e automjetit dhe ishte përplasur me një automjet të parkuar, teksa shqiptari me motor po e ndiqte pas konfliktit dhe pak pasi u spërkat me spraj në fytyrë nga viktima.

Incidenti me sa duket ka ndodhur në dy faza. Incidenti ndodhi jashtë palestrës ku shkon 29-vjeçari. Duket se 58-vjeçari ia preku biçikletën autorit të krimit dhe mes tyre ndodhi një përleshje e vogël pa u përkeqësuar. Megjithatë, pas pak kohe, 58-vjeçari u kthye në vendin e ngjarjes, duke bllokuar motorin e 29-vjeçarit me makinën e tij. Kjo e pengoi atë të largohej nga palestra. Sipas dëshmive, viktima edhe e fyeu duke i thënë “idiot i vogël” dhe e spërkati me spraj.

Më pas ndodhi edhe tragjedia. Shqiptari kishte pasur tre precedentë të mëparshëm penalë, por për vepra të lehta.

Sipas hetimit paraprak nga patologu mjeko-ligjor, ‘kocka hioide’ e qafës u gjet e thyer në anën e majtë të trupit të burrit të pafat. Një gjetje që çon në përfundimin se ose autori i krimit e ka shtypur qafën e burrit mjaft fort në sediljen e shoferit teksa e godiste, ose ia ka shtypur qafën me tërbim në timon, duke rezultuar në thyerjen e kockës.

Është e mundur që ky të ketë qenë shkaku i vdekjes së 58-vjeçarit, i cili kishte edhe një frakturë shtypëse në nofullën e poshtme, e cila mund të ketë ardhur nga grushtet që mori nga 29-vjeçari. Megjithatë, po shqyrtohet edhe mundësia që 29-vjeçari ta ketë goditur kokën e 58-vjeçarit në timonin e automjetit të tij, gjë që i shkaktoi lëndimet fatale.

E kaluara e rëndë e dhunës

Burri 29-vjeçar që dyshohet se rrahu për vdekje një shofer 58-vjeçar në një rrugë në Neos Kosmos disa orë më parë ka një të kaluar të dhunshme dhe serioze kriminale.

Autori i krimit, një ekspert i arteve marciale, i cili rrëfeu se ishte ai që sulmoi dhe rrahu barbarisht 58-vjeçarin, është arrestuar tetë herë në tre vitet e fundit për sulme të ngjashme, një prej të cilave dërgoi në spital një oficer të policisë bashkiake në Plaka, me fytyrë të lënduar.

Informacioni tregon se autoritetet ishin në dijeni të sjelljes së rrezikshme të të riut, por shumë nga sulmet e tij u konsideruan si kundërvajtje dhe jo krime, duke rezultuar në atë që ai të vazhdonte të ecë i lirë.

Vetëm qershorin e kaluar, 29-vjeçari shqiptar kishte hyrë me forcë në një kompani transporti, duke mbajtur një armë dhe kishte kërcënuar punonjësit.

Në të njëjtën kohë, njerëzit që e njohin 29-vjeçarin shqiptar, babanë e një fëmije, ndërsa gruaja e tij është shtatzënë me fëmijën e tyre të dytë, e përshkruajnë atë si një personazh të dhunshëm dhe të paqëndrueshëm, i cili krijonte episode pa ndonjë arsye të qartë.

Fakti që ai njihte arte marciale e bënte edhe më të rrezikshëm, pikërisht sepse dinte se cilat goditje mund të rezultonin fatale.