Qendrat e emigrantëve në Shqipëri, avokati i Gjykatës së BE-së: Janë të vlefshme

Marrëveshja mes Italisë dhe Shqipërisë për krijimin e qendrave të migrantëve në territorin shqiptar konsiderohet në përputhje me rregullat e Bashkimi Europian për azilin dhe kthimin, por me kusht që të respektohen plotësisht të drejtat e emigrantëve.

Ky është përfundimi i arritur nga avokati i përgjithshëm i Gjykata e Drejtësisë e Bashkimit Europian, Nicholas Emiliou, në një opinion jo detyrues që i paraprin vendimit përfundimtar të gjyqtarëve në Luksemburg.

Sipas Emiliou, e drejta e BE-së nuk e ndalon një shtet anëtar të krijojë qendra ndalimi jashtë territorit të tij, por ai mbetet përgjegjës për garantimin e të gjitha standardeve ligjore. Këto përfshijnë akses në ndihmë juridike, përkthim, si dhe mundësi komunikimi me familjarët dhe autoritetet.

Në opinion theksohet gjithashtu se duhet t’u kushtohet vëmendje e veçantë të miturve dhe personave në nevojë të veçantë.

Nga ana tjetër, kryeministrja italiane Giorgia Meloni e cilësoi këtë zhvillim si një konfirmim të linjës së ndjekur nga qeveria e saj. Ajo deklaroi se tashmë është koha për të ecur përpara me masa konkrete kundër emigracionit të paligjshëm.

Protokolli mes dy vendeve, i nënshkruar më 6 nëntor 2023 dhe i ratifikuar më 21 shkurt 2024, i jep të drejtë Italisë të ndërtojë dhe administrojë qendra ndalimi dhe riatdhesimi në Shqipëri, të cilat do të mbeten nën juridiksionin italian.

Vendimi përfundimtar i Gjykata e Drejtësisë e Bashkimit Europian pritet të shpallet në fund të majit ose në fillim të qershorit, ndërsa opinioni i avokatit të përgjithshëm konsiderohet një sinjal pozitiv për qëndrimin që mund të mbajnë gjyqtarët.