Protesta ndalon trafikun, turma hap rrugën për ambulancën mes sirenave

Marshimi masiv i lëvizjes qytetare që nisi nga bulevardi dhe kaloi përpara Kuvendit të Shqipërisë ka vijuar drejt një tjetër pike kyçe të kryeqytetit, duke u zhvendosur në kryqëzimin e njohur si “Brryli”, ku është krijuar një grumbullim i madh qytetarësh.

Mijëra protestues janë mbledhur në këtë segment rrugor, duke shkaktuar bllokim të plotë të qarkullimit të automjeteve në zonë dhe vështirësi të përkohshme në lëvizjen e trafikut urban.

Pavarësisht situatës së ngarkuar, gjatë protestës është shënuar një moment solidariteti dhe bashkëpunimi qytetar. Sipas dëshmive nga vendngjarja, në momentin kur janë dëgjuar sirenat e një ambulance që po transportonte një pacient drejt spitalit, protestuesit kanë reaguar menjëherë.

Turma është koordinuar shpejt duke krijuar një korridor të lirë në mes të rrugës, duke i mundësuar ambulancës kalimin pa vonesë dhe pa pengesa. Ky veprim është vlerësuar si një gjest qytetarie dhe respekti ndaj emergjencave mjekësore.

Situata në zonë vijon të jetë e monitoruar, ndërsa lëvizja e protestuesve mbetet aktive në disa akse kryesore të kryeqytetit.