Pak ditë më parë u përfshi në konflikt, del fotoja e biznesmenit të vrarë në Elbasan, Edmond Mëhalla

Detaje të reja janë zbardhur mbi atentatin e ndodhur mbrëmjen e së dielës në Elbasan, ku humbi jetën biznesmeni Edmond Mëhalla, 43 vjeç.

Krimi i rëndë ndodhi rreth orës 20:35, në lagjen “Emin Matraxhiu”, 43-vjeçari u gjet i vrarë brenda në automjetin e tij të parkuar, tip “Range Rover”.

Sipas të dhënave paraprake, viktima sapo kishte dalë nga zyra e tij, aty ku edhe ka bizneset dhe shtëpinë e nënës së tij.

Sapo ai është futur në makinë, është qëlluar me armë zjarri. Ai ka marrë tre plumba, dy prej të cilëve në kokë, duke i shkaktuar vdekjen e menjëhershme.

Policia ka marrë në pyetje disa persona që ndodheshin në zonën pranë vendit ku u ekzekutua biznesmeni. Burime bëjnë me dije se pak ditë më parë viktima dyshohet se ishte përfshirë në një konflikt. 43-vjeçari kishte precedent penal në fushën e narkotikëve.

Automjeti i përdorur nga atentatorët ishte një Audi ngjyrë e zezë dhe dyshohet se është larguar nga vendi i ngjarjes në aksin rrugor Elbasan-Librazhd. Viktima njihet me dy emra Edmond Hyka ose Edmond Mëhalla .