Konstatohen duke ndërtuar pa leje, arrestohen dy shtetas në Tiranë

Policia e Tiranës ka arrestuar dy shtetas ditën e sotme, pasi janë konstatuar duke bërë ndërtime pa leje. Blutë njoftojnë se kanë arrestuar 49-vjeçarin në lagjen “Ymer Kurti”, pasi po ndërtonte pa leje në lokalin e tij.

Po ashtu, është arrestuar një tjetër 49-vjeçar në fshatin Bastar Murriz, pasi edhe ai, në lokalin e tij po ndërtonte pa leje.

“Tiranë/ Vijojnë kontrollet  për evidentimin dhe goditjen e paligjshmërisë në fushën e ndërtimeve pa leje. Goditen dy raste të ndërtimeve pa leje, vihen në pranga 2 shtetas. Në zbatim të detyrave të përcaktuara në planin e veprimit të hartuar nga Drejtoria e Përgjithshme e Policisë së Shtetit, për marrjen e masave me qëllim parandalimin, evidentimin dhe ndëshkimin e ndërtimeve pa leje në të gjithë Qarkun e Tiranës, janë goditur 2 raste të ndërtimeve pa leje, në vende të ndryshme, dhe janë arrestuar dy shtetas konkretisht:

Nga specialistët për Hetimin e Krimit në Komisariatin e Policisë Nr.2 u bë arrestimi në flagrancë për veprën penale “Ndërtimi i paligjshëm”, i shtetasit A. O., 49 vjeç,pasi në rrugën “Ymer Kurti” në biznesin(lokal)në pronësi të tij, u konstatua duke ndërtuar të papajisur me leje ndërtimi nga autoritetet kompentente.

Ndërkohë, nga specialistët për Hetimin e Krimit në Komisariatin e Policisë Nr.4 u bë arrestimi në flagrancë për veprën penale “Ndërtimi i paligjshëm”, i shtetasit G. L., 49 vjeç, pasi në fshatin Bastar Murriz, në lokalin e tij, u konstatua duke kryer punime ndërtimi pa lejen përkatëse.

Materialet procedurale i kaluan Prokurorisë pranë Gjykatës së Shkallës së Parë Tiranë për veprën penale “Ndërtimi i paligjshëm”.”, njofton policia.