I shpërtheu lënda plasëse teksa po peshkonte, humb jetën 65-vjeçari në Himarë

Një ngjarje e rëndë ka tronditur mëngjesin e sotëm zonën e Himarës. Një 65-vjeçar ka humbur jetën pasi dyshohet se është dëmtuar rëndë nga shpërthimi i një lënde plasëse, të cilën po e përdorte për peshkim të paligjshëm.

Ngjarja është regjistruar rreth orës 09:00, në afërsi të zonës së Porto Palermos. Sipas informacionit paraprak të Policisë, 65-vjeçari me inicialet P. M. dyshohet se ka qenë duke peshkuar me lëndë plasëse, të identifikuar paraprakisht si dinamit.

Në rrethana ende të paqarta, lënda plasëse ka shpërthyer, duke e dëmtuar rëndë 65-vjeçarin në trup dhe gjymtyrë. Pas shpërthimit, ai ka marrë ndihmën e parë dhe është transportuar me urgjencë drejt Qendrës Shëndetësore të Himarës.

Pavarësisht ndërhyrjes mjekësore, 65-vjeçari nuk ka mundur t’u mbijetojë plagëve të marra dhe ka humbur jetën gjatë transportimit dhe marrjes së ndihmës mjekësore.

Zona ku ndodhi ngjarja është rrethuar nga shërbimet e Policisë, ndërsa në vendngjarje kanë mbërritur edhe specialistët e grupit hetimor. Në drejtimin e Prokurorisë, po kryhen veprimet hetimore për të përcaktuar me saktësi mënyrën se si ka ndodhur shpërthimi, llojin dhe origjinën e lëndës plasëse, si dhe rrethanat e plota të ngjarjes.

Peshkimi me lëndë plasëse është i ndaluar me ligj dhe përbën një aktivitet me rrezik të lartë, jo vetëm për personat që e përdorin, por edhe për njerëzit e tjerë që ndodhen në zonën përreth.

Hetimet vijojnë për dokumentimin e plotë të ngjarjes dhe përcaktimin e përgjegjësive ligjore.