Gjekmarkaj: Përjashtimi i 19 deputetëve, i pahijshëm

Deputeti Agron Gjekmarkaj ka reaguar për përjashtimin e 19 kolegëve të opozitës për protestat në seancën plenare të së enjtes.

Gjekmarkaj tha se vendimi i sekretariatit të Etikës është i pazakontë e i pahijshëm dhe tregon situatën tragji-komike në politikë.

“E pazakontë të përjashtosh 19 deputetë njëherësh, që nuk kanë bërë asgjë të jashtëligjshme… situatë tragji-komike që tregon se në njëfarë mënyre qeverinë dhe kryeministrin po i lëshojnë pak nervat. Të shkosh drejt një ndëshkimi të tillë, është e pahijshme”, u shpreh ai.

Deputeti e shikon si absurd përjashtimin e kolegëve, pasi pretendon se kauza është e drejtë.

“Kauza është e drejtë, protesta e kolegëve është e drejtë dhe unë vazhdoj ta mbështes. Nuk jemi për të qenë garniturë e qeverisë, për t’i shkelur syrin asaj, për t’i hedhur ujë sa herë ndizet ‘flaka’ e protestave. Pa u shndërruar në opozitë ‘fake’ ne mund të gjejmë mundësi që të ndërrojmë këto tema në diskurs dhe debat”, theksoi Gjekmarkaj