Dogji një biznes disa muaj më parë, arrestohet 37-vjeçari në Vlorë

Një 37-vjeçar është vënë në pranga nga policia e Vlorës. Arrestimi i tij ka ardhur pasi ai ishte shpallur në kërkim pasi ndaj tij ishte caktuar masa arrest më burg lidhur me djegien e një objekti më 11 nëntor të vitit 2025.

Ngjarja ndodhi në lagjen “28 Nëntori” ku 37-vjeçari ka djegur katin e parë të një biznesi. Autori është identifikuar si Bledar Balliu. Ai i akuzohet për veprën penale “Shkatërrim i pronës me zjarr”.

“Vlorë/ Vijon puna për kapjen dhe ndalimin e shtetasve të shpallur në kërkim. Kapet një shtetas i shpallur në kërkim për veprën penale “Shkatërrim i pronës me zjarr”.

Specialistët për Hetimin e Krimeve në Komisariatin e Policisë Vlorë, në vijim të punës për parandalimin dhe goditjen e paligjshmërisë, si dhe për kapjen e shtetasve të shpallur në kërkim, në bashkëpunim me Komisariatin e Policisë nr. 6 Tiranë, bënë të mundur lokalizimin, kapjen dhe ndalimin e shtetasit:

B.B., 37 vjeç, banues në Vlorë. Ky shtetas ishte shpallur në kërkim pasi Gjykata e Rrethit Gjyqësor Vlorë, me datë 13.01.2026, i kishte caktuar masën e sigurisë “Arrest në burg”, për veprën penale “Shkatërrim i pronës me zjarr”.

Nga hetimet intensive, të zhvilluara përgjatë disa muajve dhe me përdorimin e metodave speciale të hetimit, u dokumentua se më datë 11.11.2025, në orët e para të mëngjesit, në lagjen “28 Nëntori”, në Vlorë, 37-vjeçari ka djegur katin e parë të një subjekti privat. Materialet procedurale iu referuan Prokurorisë Vlorë për veprime të mëtejshme”, njofton policia.