Bashkia e Tiranës shton pikat e shpërndarjes për abonetë falas për pensionistët

Anuela Ristani ka njoftuar se Bashkia e Tiranës do të shtojë pikat e shpërndarjes së aboneve falas për pensionistët, me synimin për të shmangur radhët dhe lehtësuar procesin për qytetarët.

Gjatë mbledhjes së Këshillit Bashkiak, Ristani deklaroi se pikat e shërbimit do të jenë të hapura deri në 16 orë në ditë dhe se është rritur jo vetëm numri i ditëve të shpërndarjes, por edhe numri i pikave ku pensionistët mund të pajisen me abone.

Ajo sqaroi se aktualisht procesi nuk mund të realizohet përmes librezave të pensionit, pasi sistemi i biletimit kërkon një tjetër formë dokumentacioni.

Ristani bëri të ditur gjithashtu se Bashkia po punon për krijimin e një sistemi të ri më të digjitalizuar, i cili do të shmangë radhët dhe do ta bëjë procesin më efikas në të ardhmen.

Sipas saj, aktualisht po hartohen termat e referencës për këtë sistem të ri, ndërsa deri atëherë bashkia do të vijojë optimizimin e shpërndarjes përmes shtimit të pikave të shërbimit.