485 kg dr'ogë nga Amerika Latine drejt Frakullës, lihet në burg Kevin Margjoni, i ekstraduar nga Spanja

Gjykata e Posaçme ka konfirmuar masën e sigurisë “arrest në burg” për Kevin Margjonin, i cili u ekstradua pak ditë më parë nga Spanja drejt Shqipërisë. Ai akuzohet nga Prokuroria e Posaçme si një prej personave të përfshirë në trafikun e 485 kilogramëve kokainë, të zbuluara në vitin 2022 në fshatin Frakull e Madhe të Fierit.
Sipas hetimeve të SPAK, Margjoni dyshohet se ka pasur rol si bashkëfinancues dhe negociator në këtë aktivitet kriminal, përmes të cilit lënda narkotike u transportua nga Amerika Latine drejt Shqipërisë, e fshehur në një ngarkesë me pleh artificial.
Droga u zbulua në vitin 2022, gjatë një operacioni të zhvilluar në Frakull të Fierit, ku autoritetet sekuestruan 485 kilogramë kokainë. Lënda narkotike ishte tretur në një ngarkesë plehu artificial, në një përpjekje për të kamufluar transportin e saj dhe për ta futur në territorin shqiptar pa u diktuar.
Pas zbulimit të sasisë së konsiderueshme të drogës, SPAK nisi hetimet për të identifikuar personat që qëndronin pas organizimit të trafikut, financimit të tij dhe negocimit të marrëveshjeve për transportimin e lëndës narkotike.
Në kuadër të këtyre hetimeve, Kevin Margjoni u identifikua nga Prokuroria e Posaçme si një prej personave të dyshuar për përfshirje në këtë aktivitet. Sipas akuzës, roli i tij lidhet me financimin dhe negociatat për trafikimin e sasisë prej 485 kilogramësh kokainë.
Policia e Shtetit njoftoi se ekstradimi i tij nga Spanja u realizua pak ditë më parë, pas procedurave përkatëse me autoritetet spanjolle. Ai tashmë ndodhet përballë drejtësisë shqiptare, ndërsa Gjykata e Posaçme ka vendosur të lërë në fuqi masën e sigurisë “arrest në burg”.
Dosja e trafikut të kokainës në Frakull konsiderohet një prej rasteve të rëndësishme të hetuara nga SPAK, për shkak të sasisë së madhe të lëndës narkotike dhe mënyrës së pazakontë të transportimit të saj, e kamufluar në një ngarkesë plehu artificial.
Hetimet për këtë çështje synojnë të zbardhin të gjithë zinxhirin e përfshirë në trafikimin e drogës, nga financuesit dhe negociatorët deri te personat që mundësuan transportin dhe mbërritjen e saj në Shqipëri.


