24 orë në ajër pa asnjë ndalesë, avioni thyen rekordin botëror!

Një avion ka realizuar një fluturim historik, duke qëndruar në ajër për më shumë se 24 orë pa asnjë ndalesë dhe duke përshkuar një distancë prej mbi 23 mijë kilometrash. Arritja është njohur zyrtarisht nga Guinness si rekordi botëror për fluturimin më të gjatë sipas distancës nga një avion komercial. Bëhet fjalë për Airbus A350-1000ULR, i cili realizoi fluturimin në kuadër të programit të testimeve për kompaninë australiane Qantas Airways.

Avioni u nis nga Melburni, fluturoi mbi Sidnei dhe vijoi udhëtimin përmes Oqeanit Paqësor drejt Los Anxhelosit. Më pas përshkoi Amerikën e Veriut dhe Oqeanin Atlantik, kaloi mbi Londër dhe përfundoi udhëtimin në Tuluzë të Francës.

Gjatë këtij udhëtimi të jashtëzakonshëm, ekuipazhi përjetoi dy lindje dhe dy perëndime të diellit, ndërsa avioni kaloi mbi tri kontinente dhe dy oqeane. Fluturimi zgjati saktësisht 24 orë e 24 minuta, duke përshkuar 23.155 kilometra pa furnizim me karburant.

Në bord ndodheshin vetëm 13 persona, mes tyre pilotë testues, inxhinierë të Airbus, pilotë të Qantas dhe një përfaqësues i Federatës Ndërkombëtare Aeronautike. Ky rekord konsiderohet një hap i rëndësishëm drejt revolucionarizimit të udhëtimeve ajrore ndërkontinentale.

Qantas planifikon të nisë vitin e ardhshëm fluturimet direkte nga Sidnei drejt Londrës dhe Nju Jorkut, të cilat pritet të zgjasin rreth 22 orë. Këto linja do të shkurtojnë me afërsisht katër orë kohën aktuale të udhëtimit, duke eliminuar ndalesat për furnizim me karburant.

Kompania australiane ka porositur 12 avionë Airbus A350-1000ULR, ndërsa i pari pritet të dorëzohet në prill të vitit të ardhshëm. Sipas drejtuesve të Airbus, testi dëshmoi aftësinë e avionit për të realizuar fluturime jashtëzakonisht të gjata, duke hapur një kapitull të ri në historinë e aviacionit civil.