Shënohen dy raste zjarresh në Gjirokastër, shkrumbohet makina, digjet edhe kasollja

Dy vatra zjarri janë regjistruar mbrëmjen e kaluar në lagjen “Dunavat” të Gjirokastrës, duke shkaktuar dëme materiale, por pa të lënduar.

Ngjarja e parë u shënua rreth orës 23:15, kur një automjet u përfshi nga flakët. Shërbimi zjarrfikës mbërriti menjëherë në vendngjarje dhe bëri të mundur shuarjen e zjarrit. Automjeti u dogj plotësisht.

Vetëm 10 minuta më vonë, rreth orës 23:25, në afërsi të vendit ku ishte përfshirë nga zjarri automjeti, u konstatua një tjetër vatër zjarri, këtë herë në një kasolle ku ishin grumbulluar materiale të vjetra.

Edhe në këtë rast ndërhyrja e zjarrfikësve ishte e menjëhershme. Nga flakët u dogjën disa rroba dhe materiale të vjetra, ndërsa zjarri nuk shkaktoi dëme të tjera materiale.

Për shkaqet e rënies së zjarreve pritet të vijojë puna për përcaktimin e rrethanave të ngjarjeve.