Trashëgimia prej 60 milionë eurosh përfundon në gjykatë, 7 nipërve dhe mbesave u mohohet pjesa e pasurisë

Një betejë gjyqësore për një trashëgimi marramendëse prej rreth 60 milionë eurosh ka përfunduar me një vendim të papritur për shtatë nipër e mbesa në Spanjë, të cilët kërkonin pjesën e tyre nga pasuria e gjyshes.

Gjykata Provinciale e Barcelonës ka rrëzuar pretendimet e tyre, duke vendosur se trashëgimia duhet të ndahet sipas legjislacionit të Navarrës dhe jo atij të Katalonjës.

Vendimi, i marrë më 1 tetor 2026, favorizon Daríon, djalin e të ndjerës dhe përfituesin kryesor të testamentit.

Çështja nisi pas vdekjes së Adelës në shkurt 2019. Gruaja kishte katër fëmijë, por pjesën kryesore të pasurisë, përfshirë aksione kompanish, toka dhe një pronë në Pamplona, ia kishte lënë djalit të saj.

Dy vajzat hoqën dorë nga trashëgimia, ndërsa pasardhësit e tyre iu drejtuan drejtësisë.

Fillimisht, një gjykatë në Granollers u kishte njohur të drejtën për të përfituar mbi 3.2 milionë euro.

Megjithatë, një dokument i vitit 1980 ndryshoi gjithçka.

Adela kishte deklaruar në Pamplona dëshirën për të marrë statusin juridik civil të Navarrës, pas dy vitesh qëndrimi atje.

Gjykata vlerësoi se deklarata ishte e vlefshme, pavarësisht regjistrimit të mëvonshëm në vitin 2021.

Sipas ligjit të Navarrës, pjesa e detyrueshme e trashëgimisë ka karakter simbolik dhe nuk garanton përfitim financiar.

Për këtë arsye, shtatë nipërit dhe mbesat mbetën pa pjesën e kërkuar, ndërsa vlera neto e pasurisë u përcaktua në 59,996,905.80 euro.