Tirana dhe Londra zgjasin marrëveshjen/ Të dënuarit shqiptarë në Angli do të vuajnë dënimin në Shqipëri

Shtetasit shqiptarë të dënuar në Mbretërinë e Bashkuar mund të vuajnë pjesën e mbetur të dënimit në Shqipëri, në kuadër të marrëveshjes mes dy vendeve për transferimin e të burgosurve.

Vijimësia e kësaj marrëveshjeje ishte një nga çështjet kryesore të diskutuara në takimin mes Drejtoreshës së Përgjithshme të Burgjeve, Sadleva Bodo, dhe ambasadorit britanik në Tiranë, Nicholas Abbott.

Britania e Madhe është gjithashtu një prej partnerëve kryesorë në mbështetjen e sistemit penitenciar shqiptar, përmes financimit të investimeve, përmirësimit të infrastrukturës, kushteve logjistike dhe pajisjes së institucioneve të vuajtjes së dënimit me mjetet e nevojshme për punën e përditshme.

Gjatë takimit u vlerësua bashkëpunimi ndër vite dhe kontributi britanik në modernizimin e burgjeve.

Bashkëpunimi me Mbretërinë e Bashkuar pritet të vijojë me projekte të reja, mbështetje për modernizimin e burgjeve dhe forcimin e kapaciteteve të sistemit penitenciar shqiptar.