Inteligjenca Artificiale po bën "namet" në komunitet/ 9 në 10 persona nuk arrijnë ta dallojnë dot nga realiteti

Inteligjenca artificiale po e bën gjithnjë e më të vështirë të dallojmë të vërtetën nga mashtrimi në internet. Një studim i ri i kompanisë së sigurisë kibernetike Malwarebytes tregon se pothuajse 90% e njerëzve hasin vështirësi në identifikimin e përmbajtjeve të krijuara ose të manipuluara nga inteligjenca artificiale.

Anketa, e zhvilluar me 1,500 persona në Austri, Britaninë e Madhe, Gjermani, Zvicër dhe Shtetet e Bashkuara, zbuloi se 88% e të anketuarve thanë se po e kanë gjithnjë e më të vështirë të kuptojnë nëse një përmbajtje online është autentike apo është prodhuar nga inteligjenca artificiale.

Por shqetësimi nuk lidhet vetëm me videot, fotot apo tekstet e krijuara nga AI. Pothuajse e njëjta përqindje e pjesëmarrësve deklaruan se e kanë të vështirë të dallojnë mashtrimet nga përmbajtja e besueshme.

Problemi duket se është përkeqësuar ndjeshëm në vetëm një vit. Në sondazhin e vitit të kaluar, 66% e të anketuarve kishin deklaruar se përballeshin me të njëjtën vështirësi.

Mashtrimet e personalizuara po shtohen
Sondazhi zbuloi gjithashtu një tjetër element shqetësues: një në katër persona tha se gjatë 12 muajve të fundit kishte marrë mesazhe të personalizuara që synonin mashtrimin.

Sipas ekspertëve, mashtruesit po përdorin gjithnjë e më shumë mjetet e inteligjencës artificiale për të krijuar komunikime më bindëse dhe për të shfrytëzuar të dhënat personale, si dhe marrëdhëniet e besimit mes njerëzve.

“Përdorimi i chatbot-eve dhe mjeteve të avancuara të inteligjencës artificiale po e zbeh gjithnjë e më shumë vijën ndarëse mes së vërtetës dhe së rremes”, thuhet në raportin e Malwarebytes.

Njerëzit po humbasin besimin te rrjetet sociale
Përballë këtij realiteti, përdoruesit po tregohen më të kujdesshëm në internet. Më shumë se tre në pesë persona deklaruan se kanë reduktuar përdorimin e rrjeteve sociale, kanë fshirë përmbajtje të vjetër ose po publikojnë më pak informacione personale për veten dhe familjarët.

Ekspertët paralajmërojnë se kjo situatë mund të ketë ndikim edhe te platformat e mëdha sociale, modeli i biznesit i të cilave mbështetet në mbledhjen dhe përdorimin e të dhënave të përdoruesve, veçanërisht për reklamat e targetuara.

Në një internet ku imazhet, videot, zërat dhe mesazhet mund të krijohen me pak klikime, sfida po bëhet gjithnjë më e madhe: si të kuptojmë se çfarë është e vërtetë dhe çfarë është krijuar për të na mashtruar?

Raporti i Malwarebytes tregon se përgjigjja po bëhet gjithnjë e më e vështirë për miliona përdorues.