Të gjithë me studentët, sot në orën 14:00 protestë kombëtare para Ministrisë së Arsimit! Të rinjtë kërkojnë dorëheqjen e Edi Ramës

Studentët do të zhvillojnë sot protestë kombëtare në orën 14:00 para Ministrisë së Arsimit.

Të rinjtë refuzojnë dialogun me kryeministrin, të kërkuar me aq ngulm nga ky i fundit. Rama bëri publike dhe një platformë online për të komunikuar me ta. Protestuesit bëjnë thirrje për këdo që të bashkohet dhe të mos frikësohet nga kërcënimet e pushtetit dhe gjobat që policia po vendos ndaj qytetarëve.

Në krah të tyre janë bashkuar edhe pedagogë, të cilët kanë shprehur publikisht solidaritetin me protestuesit.

Më herët, do jetë PDsë që do mbledhë mbështetësit e saj në ora 12:00 te Kryeministria.

Lideri demokrat Sali Berisha, u bëri dje thirrje qytetarëve që të bashkohen ditën e shtunë në protestë në mbështetje të kauzës së studentëve shqiptarë.

Në një konferencë për mediat, Berisha e cilësoi “revoltën studentore” si një kauzë që tejkalon bindjet politike, duke theksuar se suksesi i saj është në interes të çdo qytetari që dëshiron të ndërtojë të ardhmen në Shqipëri.

Ai u bëri apel qytetarëve që të mbështesin studentët, duke vlerësuar guximin, vendosmërinë dhe sakrificat e tyre.