Psikologjia zbulon sekretin/ Gjestet e vogla të përditshme mund të shpëtojnë një lidhje

Dy studime të reja në psikologjinë e marrëdhënieve tregojnë se çiftet që zgjasin nuk mbështeten te vendimet e mëdha apo debatet e forta, por te veprimet e vogla të përditshme.

Sipas studiuesve, problemet në çift shpesh shoqërohen me reagime të menjëhershme si diskutime të ashpra ose vendime të nxituara për ndarje.

Megjithatë, gjetjet tregojnë se marrëdhëniet e qëndrueshme ndërtohen më shumë nga komunikimi i vazhdueshëm, mirëkuptimi dhe gjestet e vogla të kujdesit.

Në një nga studimet, ku u përfshinë rreth 100 persona, u vu re se dy faktorët më të rëndësishëm për përmirësimin e marrëdhënies janë përpjekja për të kuptuar nevojat e partnerit dhe hapja për të folur për problemet në vend që t’i shmangësh.

Po ashtu, u pa se shprehja e dashurisë në mënyra konkrete ka më shumë ndikim sesa përqendrimi te pamja apo interesat personale.

Studiuesit përmendin edhe disa elemente që ndihmojnë në marrëdhënie të qëndrueshme, si komunikimi i hapur, besimi, respektimi i hapësirës personale, kompromisi dhe menaxhimi i konflikteve pa tension të tepruar.

Një studim tjetër me 175 çifte të martuara tregoi se gjestet e vogla të kujdesit përmirësojnë jo vetëm marrëdhënien, por edhe mirëqenien personale.

Megjithatë, efekti është më i fortë kur partneri i vëren këto gjeste, ndërsa personi që i bën përfiton gjithsesi nga vetë veprimi.

Sipas studiuesve, vlera e vërtetë e marrëdhënies nuk qëndron te gjestet e mëdha, por te kujdesi i përditshëm dhe i qëndrueshëm.