Rrëmbime, grabitje dhe zhvatje, arrestohet personazhi i njohur si “Mbreti iranian i Instagramit”

Autoritetet amerikane kanë arrestuar Farzad “Tony” Toutouni, një shtetas iranian i njohur në rrjetet sociale si “Mbreti iranian i Instagramit”, për shkak të stilit të tij luksoz të jetesës dhe fotografive që publikonte në platformë.

Sipas njoftimit të Shërbimit Amerikan të Emigracionit dhe Doganave (ICE), 55-vjeçari u arrestua më 27 tetor në Los Angeles. Ai akuzohet për një histori të gjatë veprash penale, përfshirë falsifikim, rrëmbim, grabitje dhe zhvatje.

Toutouni ka më shumë se 1 milion ndjekës në Instagram, ku përdor emrin “Lunatic Living”. Në profilin e tij publikonte vazhdimisht fotografi me makina luksoze, avionë privatë, tufa me kartëmonedha 100-dollarëshe dhe femra të veshura në mënyrë provokuese.

Sipas autoriteteve, aktiviteti i tij kriminal daton që në vitin 1989. Ai është arrestuar ndër vite për kërcënime kriminale, komplot, si dhe posedim dhe shitje të substancave të kontrolluara. Gjithashtu, është dënuar me më shumë se 16 muaj burg për një sërë veprash, mes tyre falsifikim çeqesh, vjedhje të të dhënave të kartave, rrëmbim, grabitje dhe zhvatje.

Historia e tij me autoritetet amerikane të emigracionit nis shumë vite më parë. Toutouni hyri për herë të parë në SHBA në vitin 1983, në mënyrë të ligjshme. Në vitin 1993, një gjykatë emigracioni urdhëroi largimin e tij nga vendi, por vendimi nuk u zbatua. Në vitin 1999, ai u dëbua drejt Meksikës, pas një tjetër urdhri largimi.

Sipas deklarimeve të tij të cituara nga ICE, ai u rikthye në mënyrë të paligjshme në SHBA më 4 prill 2011, duke kaluar një lumë pranë Saint Clair, në Michigan, me një mjet lundrues elektrik që kishte blerë në Kanada.

Autoritetet amerikane kanë përmendur gjithashtu një ngjarje të rëndë të vitit 2023. Në qershor të atij viti, Emil Lahaziel, një emigrant izraelit, u vra jashtë një rezidence në West Hollywood që ishte marrë me qira nga Toutouni. Ngjarja u lidh nga hetuesit me një lojë pokeri me shuma të mëdha parash. Megjithatë, autoritetet nuk e kanë implikuar Toutounin në këtë vrasje.

Aktualisht, ai ndodhet në paraburgimin e ICE, në pritje të procedurave për largimin e tij nga Shtetet e Bashkuara.