Rëndohet situata për aktorin e njohur Russell Brand, shtohen edhe 6 akuza për abuzim seksual

Russell Brand po përballet me gjashtë akuza të reja për abuzim seksual dhe sulm ndaj grave, vetëm disa ditë pasi u dënua për një akuzë për përdhunim dhe tre akuza për sulm seksual, për të cilat u dënua me 10 vjet e gjashtë muaj burg.

Sipas Times of London, gjashtë gra kanë përshkruar raste të reja të dhunës seksuale  dhe sjelljes shtrënguese nga komediani 51-vjeçar britanik. Gazeta publikoi hetimin fillestar mbi sjelljen e tij në vitin 2023, gjë që bëri që më shumë gra të kontaktonin policinë dhe kontribuan në hetimin që çoi në dënimin e tij të fundit.

Një nga gratë, e identifikuar nga Times si Alex, pretendon se Brad kreu marrëdhënie seksuale me të pa pëlqimin e saj ndërsa ata ishin tashmë në një lidhje. Ajo tha se komediani kreu marrëdhënie seksuale, pavarësisht dëshirës së saj.

Një grua e dytë pretendoi se Brad vazhdoi të bënte marrëdhënie seksuale me të pavarësisht lutjeve të saj të përsëritura për të ndaluar. Gruaja ishte 19 vjeç kur takoi komedianin në vitin 2007 në një shfaqje komedie stand-up.

Një grua e tretë, e cila punonte në një vend në Londër që Brad vizitoi në vitin 2015, tha se një kolege iu afrua dhe i tha “Russell të do” dhe i vuri në dukje se ajo ishte në tualetin për persona me aftësi të kufizuara. Sipas padisë së saj, Brand u përpoq ta kapte, duke u shtirur sikur kishte nevojë për letër higjienike. Në atë kohë, komediani ishte në një lidhje me gruan e tij aktuale, Laura Brand .

Russell Brand ka mohuar vazhdimisht çdo sjellje të keqe seksuale dhe është deklaruar i pafajshëm gjatë gjyqit të tij. Ai e ka quajtur sjelljen e tij të kaluar ndaj grave “të papranueshme, por të ligjshme”. Në dëshminë e tij në gjykatë, ai argumentoi se “pëlqimi është themelor, thelbësor, i nevojshëm dhe në shumë mënyra më i rëndësishëm sesa vetë akti seksual”.

Duke e dënuar atë pas një gjyqi katër-javor, gjykatësi Benathan e quajti Brandt një “grabitqar seksual”, duke vënë në dukje se fama e tij e mbrojti atë deri në vitin 2023, kur Channel 4 dhe Times publikuan për herë të parë akuzat. Gjykatësi vlerësoi “vendosmërinë dhe guximin” e grave që e çuan çështjen para drejtësisë, duke thënë se “pavarësisht se çfarë veshin gratë, ku shkojnë ose çfarë pinë, ato kanë të drejtë të thonë jo dhe të kërkojnë drejtësi kur grabitqarët seksualë si ju, Russell Brand, veproni pa pëlqimin e tyre”.

Ndërkohë, Policia Metropolitane e Londrës tha se akuza të reja ishin bërë kundër Brandt gjatë gjyqit. Autoritetet policore po shqyrtojnë raportet përkatëse për të vendosur për veprimet e tyre të ardhshme.