Protestat kundër Ramës, studenti i përgjigjet ftesës së kryeministrit: Nuk kemi si të dialogojmë me dikë që po i kërkojmë dorëheqjen

Në ditën e 14-të të protestave studentore në Tiranë, një student i sapodiplomuar në Mjekësi ka reaguar ndaj deklaratave të kryeministrit Edi Rama për masa të ashpra ligjore ndaj protestuesve, duke theksuar se e drejta për protestë dhe liria e shprehjes garantohen nga Kushtetuta.

Sipas tij, kryeministri mund të bëjë deklarata të ndryshme, por ato nuk mund të zëvendësojnë ligjin dhe institucionet demokratike.

“Kryeministri shpesh, në deklaratat e veta, përpiqet të shfaqet në sytë e ndërkombëtarëve si personi më demokratik që mund të ketë Shqipëria apo Ballkani i rrëmujshëm, siç na klasifikon shpesh Europa. Kryeministri mund të thotë 1.100 gjëra, por Kushtetuta është aty për të siguruar të drejtën e fjalës, të drejtën e lirisë, për të protestuar.

Unë mendoj se ende nuk kanë vdekur institucionet në Shqipëri, pavarësisht çdo gjëje që kryeministri thotë apo mendon se fjala e tij mund të bëhet ligj një ditë”, u shpreh studenti.

Sa i përket ftesës së kreut të qeverisë për dialog, i sapodiplomuari në Mjekësi u shpreh se një përballje e tillë nuk do të sillte zgjidhje, duke theksuar se kërkesa kryesore e protestuesve është dorëheqja e kryeministrit.

“Ne e kemi parë shpesh që një dialog me kryeministrin nuk është një dialog që i jep një zgjidhje. Dhe nuk mund të dialogojmë me dikë që i kërkojmë dorëheqjen. Do të ishte dialogu më proporcional vetëm me partitë që janë pjesë e Parlamentit, vetëm e vetëm për t’u kërkuar që edhe ato të bëhen pjesë e këtij ndryshimi”, deklaroi studenti në ditën e 14-të të protestave studentore në kryeqytet.