Rama deputet në Vlorë apo në Durrës? Cilat janë dy gratë që e presin me padurim këtë vendim

Zgjedhjet parlamentare të 25 Prillit e nxorën atë dhe partinë e tij fitues me 74 mandate, por kryeministri Edi Rama nuk e ka vendosur ende se ku do të jetë deputet në katër vitet e ardhshme. Kreu i qeverisë ishte vendosur në listë “në vijën e zjarrit” në Vlorë dhe Durrës, ku objektivi i mandateve për PS ishte 8.

Në të dyja qarqet PS arriti të sigurojë objektivin, ndërsa kryeministri Edi Rama pas këtij rezultati është fitues në të dyja qytetet. Ai nuk e ka vendosur ende se ku do të qëndrojë për të përfaqësuar elektoratin në Kuvend, ndërkohë që sa i përket rezultatit, durrsakët i kanë dhënë më shumë vota.

Në Durrës Rama ka arritur të sigurojë 15871vota, përkundër 11412 votave që ka grumbulluar në Vlorë.  Nëse ai vendos të qëndrojë si deputet në Durrës, Rama fut në listën e deputetëve, kandidaten e 9 në listën e Vlorës, Teuta Ramaj e cila ka arritur të sigurojë 1738 vota.

Teuta Ramaj
Ndërkohë në rast se ndodh e kundërta, nëse qëndron në Vlorë, në Durrës vjen në Kuvend Ana Dhamo që ka siguruar më shumë vota se Ramaj, 2031 në total.

Ana Dhamo
Më 12 Mars teksa prezantonte kandidatët e Durrësit, Rama e cilësoi pozicionin e tij një garë mes njerëzve të babës dhe nënës duke iu referuar kështu rrënjëve të prindërve të ti.

“Është një garë mes njerëzve të nënës dhe të babës, jam kurioz të di se kush do më dojë më shumë. Jam shumë i vendosur që bashkë me të gjithë miqtë dua të bëj për Durrësin atë që Durrësi pret dhe meriton dhe ta shëroj me fakte dhe një xhelozi që është krijuar për Vlorë. janë krijuar dy porta të bukura bregdetare dhe të hyrjes nga Mesdheu në Shqipëria dhe dy vende me karakteristika të ndryshme”, shprehej Rama rreth dy muaj më parë