Meta reagon nga qelia: Sot dola para një gjyqi ushtarak! Më është ndaluar komunikimi me mediat dhe djalin

Kreu i PL, Ilir Meta ka reaguar në Facebook ku deklaron se ka dalë para një Komisioni Disiplinor ku i është komunikuar se e ka të ndaluar të flasë me gazetarët.

Meta shprehet po ashtu se i është ndaluar sot që të takonte djalin pasi në burg ishin lejuar të hyjnë 2 vajzat dhe motra e tij, me arsyetimin se nuk lejohen 4 persona.

Reagimi i plotë: 

Të dashur miq, Sot u thirra sërish para një Komisioni Disiplinor, si gjyq ushtarak, për një gabim “shumë të rëndë”: Dje dhashë një intervistë në mesditë për gazetaren Aida Tancica në MCN TV, nga telefoni i Avokatit tim, Kujtim Cakrani.

Kur herën e parë fola me gazetaren Beti Njuma, më thanë ke shkelur rregulloren se ke folur pas orës 20:00, ndërkohë sot u thirra nga “Disiplina” për arsyen e vërtetë, se nuk duan të komunikoj me gazetarët.  Çfarë dallkaukësh! Mirë që ping-pongun ma kanë ndaluar, por tani duan të më ndalojnë edhe lirinë e fjalës.

Nuk mbaron me kaq. 

Po sot, më në fund pas 20 ditësh, më lanë të takohesha me motrën dhe dy nga tre fëmijët. U mërzita fillimisht kur në takim pashë vetëm motrën dhe dy vajzat, por jo djalin. 

Më sqaruan se Besi po priste jashtë se rregullorja nuk lejon më shumë se 3 veta në takim, kur ndërkohë gjatë 8 muajve, në një takim në javë që kam bërë me familjarët, siç do i paraburgosur tjetër, i kam takuar të 4-ët bashkë..Në këto kushte, kur masat represive përforcohen çdo ditë me "risi", kam vendosur të realizoj një formë të re komunikimi me publikun, me letra të hapura.

Nesër, letra e parë e hapur, do të jetë për Z. Arben Ahmetaj.