Berat/ PS i mori mandatin, LSI kërkon procesverbalin në KZAZ me numër 66

LSI ka reaguar pas rezultatit të qarkut të Beratit, ku ka mbetur pa asnjë mandat. Ka qenë Ardit Çela, drejtuesi i LSI për këtë qark dhe i kryesuesi i listës së deputetëve, i cili pretendon se ka probleme në kutinë me numër 3318, që i përket fshatit Bogdan. Më tej, ai ka kërkuar të shikojë procesverbalin në KZAZ me numër 66.

Lidhur me këtë pretendim, ka reaguar Kozeta Nushi, kryetarja e KZAZ me numër 66. Ajo tha se procesverbalet janë bashkëngjitur me të gjitha ato përfundimtaret që do të dërgohen më pas në KQZ.

 “Një parregullsi që u konstatua në një kuti votimi, u bë prezent me anën e një procesverbali, i cili iu bashkëngjit procesverbalit përfundimtar të rezultateve. Ky procesverbal do të shkojë bashkë me rezultatet përfundimtare në KQZ.

Ne jemi të detyruar të kontrollojmë dhe të lexojmë votën e lexuesit në çdo kuti votimi që nuk është dëmtuar dhe që është marrë në dorëzim si kuti e rregullt dhe mendoj që kemi zbatuar ligjin. Votat janë të pasqyruara në kuti.

Në atë kuti ishin dy fleta të ngjitura, një kishte vulën e votuesit, ndërsa tjetra kishte një shenjë. Kjo bëri që të mos kishte mospërputhje me një numër votuesish”, u shpreh Nushi.