Ngërç për zgjedhjen e kryeprokurorit të ri, KLP tejkalon afatet

Aktualitet

Ngërç për zgjedhjen e kryeprokurorit të ri, KLP tejkalon

Këshilli i Lartë i Prokurorisë ka tejkaluar afatet ligjore për përzgjedhjen e kandidatëve për postin e Prokurorit të Përgjithshëm, ndërsa mandati i Olsian Çelës përfundon më 5 dhjetor.

KLP-ja duhet t’i propozojë Kuvendit tre kandidatë për postin, por deri tani nuk ka përfunduar as fazën e vlerësimit paraprak të pesë kandidatëve që kanë aplikuar.

Sipas të dhënave, formularët e kandidatëve duhet t’i ishin dërguar Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI) brenda pesë ditëve nga përfundimi i afatit të aplikimit, më 1 gusht. Megjithatë, kjo procedurë është kryer rreth një muaj e gjysmë me vonesë.

“Kemi kaluar çdo afat”, deklaroi anëtarja e KLP-së, Ledina Riza.

Ndërkohë, vlerësimi paraprak i kandidatëve, i cili sipas ligjit duhet të përfundonte brenda 45 ditëve, pra deri më 15 shtator, nuk ka nisur ende. KLP-ja nuk ka hartuar as listën e kandidatëve që plotësojnë kriteret dhe as atë të kandidatëve që përjashtohen nga gara.

Edhe pse ligji parashikon që Inspektori i Lartë i Drejtësisë të nisë verifikimet për arsyet e zvarritjes së procedurave, deri tani nuk është kryer një verifikim i tillë.

Gjatë muajit shtator, mbledhjet e KLP-së janë shoqëruar me debate dhe kërkesa për përjashtimin e anëtarëve nga procesi i përzgjedhjes. Në mbledhjen e fundit, me kërkesë të njërit prej anëtarëve, Zeqir Hoda u përjashtua nga të gjitha procedurat e vlerësimit, duke e çuar numrin e anëtarëve pjesëmarrës nga 11 në 10.

Ndërkohë, ende nuk janë shqyrtuar kërkesat për përjashtimin e dy anëtarëve të tjerë, Vatë Stakës dhe Sokol Stojanit.

Mbledhja e radhës e KLP-së pritet të zhvillohet të enjten. Disa nga mbledhjet e mëparshme kanë dështuar për shkak të mungesës së kuorumit.

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion