Lë qelinë për t'u nisur drejt Kosovës? Jakup Krasniqi përballet me një situatë të rëndë familjare
Ish-kryetari i Kuvendit të Kosovës, Jakup Krasniqi, është nisur këtë të mërkurë nga Haga drejt Kosovës, pasi ka marrë lejen e autoriteteve për t’u larguar përkohësisht nga qelia për arsye familjare. Shkak është bërë gjendja e rënduar shëndetësore e bashkëshortes së tij, Sevdije Krasniqi.
Sipas raportimeve të mediave në Kosovë, ish-drejtuesi i Ushtrisë Çlirimtare të Kosovës pritet të qëndrojë pranë familjes në këto momente të vështira. Ndërkohë, efektivë të EULEX-it janë parë pranë banesës së tij në lagjen Velania të Prishtinës.
Kjo është hera e dytë që Krasniqi kthehet në Kosovë që prej transferimit të tij në Hagë, më shumë se pesë vite më parë.
Jakup Krasniqi, i cili gjatë luftës në Kosovë ishte një nga zërat kryesorë të komunikimit të UÇK-së me komunitetin ndërkombëtar, u dënua dy muaj më parë nga Gjykata Speciale me 25 vite burgim, pasi u shpall fajtor për akuza që lidhen me krime lufte.
Në të njëjtin proces gjyqësor janë të përfshirë edhe ish-presidenti Hashim Thaçi, Kadri Veseli dhe Rexhep Selimi.


