"Zgjedhjet në Kosovë, KQZ zbardh si u ndanë votat sipas partive, sa mori VV?"

Komisioni Qendror i Zgjedhjeve (KQZ) ka njoftuar se deri në orët e hershme të mëngjesit janë numëruar 99.45% të votave nga zgjedhjet e parakohshme parlamentare. Sipas të dhënave të përditësuara, kanë mbetur pa u numëruar edhe 14 kuti votimi.

Në rezultatet preliminare, Lëvizja Vetëvendosje! vazhdon të prijë me 49.28% të votave, apo 430,459 vota.

Në vendin e dytë renditet Partia Demokratike e Kosovës (PDK) me 20.99%, përkatësisht 183,389 vota, ndërsa Lidhja Demokratike e Kosovës (LDK) është e treta me 13.58%, apo 118,601 vota.

Pasojnë Aleanca për Ardhmërinë e Kosovës (AAK) me 5.68% ose 49,598 vota, Lista Serbe me 4.79% apo 41,823 vota, si dhe Nisma Socialdemokrate me 1.71%, përkatësisht 14,975 vota.

Pjesëmarrja në zgjedhje, sipas përditësimit të fundit nga KQZ, është 44.99% e qytetarëve me të drejtë vote.

Procesi zgjedhor u zhvillua në 948 qendra të votimit, me gjithsej 2,614 vendvotime, prej të cilave 910 qendra me 2,557 vendvotime për votimin e rregullt dhe 38 qendra me 57 vendvotime për të mundësuar votimin me kusht.

Në garë për të zënë një vend në Kuvendin e Kosovës ishin gjithsej 1,146 kandidatë për deputetë nga 23 subjekte politike që garuan në këto zgjedhje.