VIDEO/ Në kërkim nga Interpol, Milan Radoiçiç shfaqet feston ditëlindjen me fishekzjarre

Ish-politikani serb në Kosovë, Milan Radoiçiç ka festuar si “komandant” i lirë ditëlindjen e tij të 46-të në Kopaonik të Serbisë, teksa Interpol e ka shpallur në kërkim ndërkombëtar për sulmin terrorist në Banjskë.

Për ditëlindjen e Radoiçiç kanë shpërthyer fishekzjarret, teksa d isa persona kanë shpalosur një pankartë ku shkruhej “Gëzuar ditëlindjen komandant”. Pamjet i ka publikuar në rrjete sociale politikani serb, Nemanja Saroviç.

“Milan Radoiçiç ishte në Kopaonik dje. Me fishekzjarrë dhe banerin ‘Urime ditëlindjen komandant’ festoi ditëlindjen e 46-të. Çfarë i ka dhuruar Aleksandar Vuçiçi?” ka pyetur udhëheqësi i lëvizjes politike “Dashuri, Besim, Shpresë” në Twitter.

Në video shihet Radoiçiçi nga prapa teksa u afrohet disa burrave që mbajnë banerin. Në video shihen edhe fishekzjarrët.

Radoiçiç ka marrë përgjegjësinë për sulmin terrorist të 24 shtatorit në Banjskë të Zveçanit, ku mbeti i vrarë polici Afrim Bunjaku. Në aksionin pasues të Policisë së Kosovës, u vranë tre sulmues. Shumica e sulmuesve ikën. Pamjet kanë treguar qartë udhëheqjen e grupit nga Radoiçiçi. Ai ka pranuar përgjegjësinë, ndërsa në Serbi është liruar.

Ditë më parë, ministri i Punëve të Brendshme i Kosovës, Xhelal Sveçla, njoftoi se të gjithë të dyshuarit për sulmin terrorist në Banjskë të Zveçanit janë vendosur në sistemin e urdhërarrestit ndërkombëtar të Interpolit.