"Kjo është beteja e fundit" / Spotet e Trump ndezin polemika, opozita: Propagandë e paguar nga taksapaguesit

Presidenti amerikan Donald Trump është akuzuar nga opozita për përdorim të paligjshëm të parave të taksapaguesve për një spot televiziv që e lavdëron atë, vetëm disa javë para zgjedhjeve të mesmandatit në SHBA.

Sipas raportimeve të mediave amerikane, një video 30-sekondëshe me Trump u transmetua të dielën gjatë ndeshjeve të futbollit amerikan. Në spot, presidenti shfaqet bardhë e zi, duke ecur në heshtje përgjatë një korridori dhe duke parë kamerën, ndërsa në sfond dëgjohen fragmente nga fjalimet e tij, ku ai sulmon “luftënxitësit”, “komunistët” dhe “mbrojtësit e një rendi të globalizuar”.

Videoja nis me frazën “Kjo është beteja e fundit”, ndërsa në fund të ekranit shfaqet shënimi: Paguar nga qeveria amerikane.

Spotit iu referua ashpër opozita demokrate, e cila pretendon se përdorimi i fondeve publike për një material të tillë përbën propagandë politike.

“Është e paligjshme që qeveria të përdorë paratë e taksapaguesve amerikanë për të financuar reklama politike. Kjo është propagandë dhe ju po e paguani faturën”, tha përfaqësuesi demokrat Mike Levin në një video të publikuar në X.

Edhe senatori demokrat John Hickenlooper e cilësoi videon si “propagandë” dhe “të paligjshme”.

Shtëpia e Bardhë i ka hedhur poshtë këto akuza, duke argumentuar se videoja nuk është reklamë politike, por një “njoftim i shërbimit publik”. Sipas administratës amerikane, qeveria ka të drejtë të transmetojë materiale reklamuese dhe videoja është “edukative dhe patriotike”.

Një zyrtar amerikan tha gjithashtu se Trump nuk është “i njëjti kandidat” në zgjedhjet e Kongresit të vjeshtës dhe se videoja “nuk bën thirrje për ndonjë veprim specifik”.

Trump e kishte publikuar fillimisht këtë video në vitin 2023 në rrjetin e tij Truth Social, duke pretenduar në atë kohë se ishte financuar nga fushata e tij.

Kjo nuk është videoja e vetme e transmetuar së fundmi me të njëjtin slogan. Javën e kaluar u shfaq një tjetër spot që lartësonte karrierën e presidentit dhe mbante shënimin “Paguar nga qeveria amerikane”. Në të përsëritej edhe slogani “Amerika nuk do të bëhet kurrë një vend komunist”.

Trump u ka bërë kohët e fundit thirrje votuesve që të sillen “sikur” ai të ishte kandidat në zgjedhjet e mesmandatit, në një përpjekje për të mobilizuar mbështetësit e tij përpara zgjedhjeve që do të përcaktojnë përbërjen e Kongresit.