Identifikohet autori i grabitjes me ar'më në Rrugën e Kombit, shpallet në kërkim 36-vjeçari

Policia e Lezhës ka identifikuar dhe shpallur në kërkim një 36-vjeçar, të dyshuar si një nga autorët e një grabitjeje me armë zjarri të ndodhur në gusht të vitit 2021, në Rrugën e Kombit, në territorin e Mirditës.

 Sipas njoftimit të policisë, pas hetimeve të kryera në bashkëpunim me Prokurorinë e Lezhës, është bërë i mundur identifikimi i shtetasit me inicialet N. K., 36 vjeç, banues në Pukë, si njëri prej personave të dyshuar për ngjarjen e regjistruar më 31 gusht 2021.

Në atë kohë, shtetasit A. K. i ishte marrë një shumë parash nën kërcënimin e armës së zjarrit.

Në vijim të hetimeve, Gjykata e Lezhës ka caktuar ndaj 36-vjeçarit masën e sigurisë “Arrest në burg”, ndërsa policia vijon punën për lokalizimin dhe kapjen e tij.

 Gjithashtu, hetuesit kanë identifikuar edhe një person tjetër, i dyshuar si i përfshirë në grabitje, por për arsye hetimore nuk janë bërë publike të dhënat e tij.

 Policia bën me dije se hetimet vijojnë për dokumentimin e plotë të ngjarjes dhe identifikimin e personave të tjerë që mund të kenë marrë pjesë në këtë grabitje. Materialet procedurale i janë referuar Prokurorisë për veprime të mëtejshme.