Grabitja galopante e kriptove, Binance mbulon 95% të humbjeve prej 6.3 miliardë dollarësh, zbulohen autorët e sulmit

Binance ka arritur të mbulojë rreth 95% të aseteve të prekura nga grabitja kibernetike prej 6.3 miliardë dollarësh, ndërsa tërheqjet e klientëve nga platforma kanë arritur në 3.64 miliardë dollarë. Sipas të dhënave të publikuara nga kompania dhe të raportuara nga Reuters më 1 nëntor, daljet e fondeve janë stabilizuar pas një rritjeje fillestare, ndërsa shërbimet e tërheqjes janë rikthyer gradualisht.

Pavarësisht përmasave të sulmit, kompania ka deklaruar se do të mbulojë plotësisht humbjet e përdoruesve përmes rezervave dhe fondeve të saj. Megjithatë, zëvendësimi i aseteve të vjedhura nuk nënkupton se ato janë rikuperuar fizikisht nga hakerët.

Ndërkohë, Byroja Federale e Hetimit në SHBA (FBI) ka identifikuar Korenë e Veriut si përgjegjëse për sulmin, duke ia atribuuar atë grupit të njohur si TraderTraitor.

Sipas FBI-së, vjedhja ndodhi më 29 tetor 2026 dhe përfshiu më shumë se 6 miliardë dollarë në asete virtuale. Autoritetet amerikane kanë konstatuar se hakerët kanë nisur konvertimin e fondeve të vjedhura kryesisht në Ethereum, në një përpjekje për të fshehur origjinën e tyre.

Hetuesit paralajmërojnë se fondet mund të kalojnë më tej përmes platformave të financave të decentralizuara (DeFi) dhe shërbimeve të shkëmbimit të menjëhershëm të kriptomonedhave, duke e bërë më të vështirë gjurmimin e transaksioneve.

Grupi TraderTraitor është lidhur edhe me grabitjen e platformës Bybit në shkurt të vitit 2025, kur u vodhën rreth 1.5 miliardë dollarë në kriptomonedha. FBI-ja ia kishte atribuuar edhe atë sulm aktorëve kibernetikë të lidhur me Korenë e Veriut.

Si u realizua sulmi?
Binance ka bërë të ditur se incidenti përfshiu komprometimin e kuletave të saj të nxehta (hot wallets), të cilat përdoren për transaksionet dhe tërheqjet e klientëve.

Sipas raportimeve, sulmi u realizua brenda një periudhe shumë të shkurtër, duke ngritur pikëpyetje mbi sigurinë e infrastrukturës teknologjike të bursave të mëdha të kriptomonedhave.

Kompania ka premtuar se do të zëvendësojë të gjitha asetet e prekura, duke përdorur fondet e veta dhe rezervat e posaçme për raste emergjente.

Binance thekson se pjesa më e madhe e detyrimeve ndaj klientëve tashmë është mbuluar dhe se po vijon puna për pjesën e mbetur.

Sulmi ka rikthyer shqetësimet mbi cenueshmërinë e platformave të aseteve digjitale dhe aftësinë e grupeve të organizuara për të kryer operacione kibernetike në shkallë miliarda dollarëshe.

Rasti i Binance vjen pas një serie sulmesh të mëdha ndaj sektorit të kriptomonedhave, ndërsa autoritetet amerikane paralajmërojnë për aktivitetin e vazhdueshëm të grupeve të lidhura me Korenë e Veriut.