Ekstradohet nga Emiratet e Bashkuara Arabe drejt Belgjikës kreu i “Kompanisë Bello”, Denis Matoshi

Pas një procedure të gjatë dhe komplekse ligjore, autoritetet e Emirateve të Bashkuara Arabe kanë miratuar ekstradimin drejt Belgjikës të shtetasit shqiptar Denis Matoshi.

Vendimi është konfirmuar zyrtarisht nga Prokuroria Belge, duke i hapur rrugën transferimit të tij të menjëhershëm drejt Antwerp-it për ekzekutimin e dënimit me burgim.

37-vjeçari, i njohur në rrethet kriminale me pseudonimin “Shqiptari i gjatë”, konsiderohet nga organet e drejtësisë evropiane si një nga figurat qendrore drejtuese të organizatës ndërkombëtare të trafikut të lëndëve narkotike, “Kompania Bello”. Gjykata e Antwerp-it e ka dënuar atë në mungesë me 10 vjet burgim për rolin e tij kyç në menaxhimin e rrjetit të kokainës nga Amerika Latine drejt portit të Antwerp-it.

Ekstradimi i Matoshit përbën një zhvillim të rëndësishëm në bashkëpunimin gjyqësor mes Belgjikës dhe Emirateve të Bashkuara Arabe, një marrëdhënie që prej vitesh ka synuar shkatërrimin e strehëve të sigurta për eksponentët e krimit të organizuar në Dubai.

Sipas mediave belge, vendimi përmbyll një proces shumëvjeçar hetimor e diplomatik, ndërsa procesi i transferimit fizik të 37-vjeçarit nën masa të rrepta sigurie pritet të realizohet brenda pak orëve.