Turqia zhvillon operacionet antiterroriste në 47 provinca, 298 persona të arrestuar

Policia turke ka arrestuar 298 persona të dyshuar për lidhje me organizatën terroriste Shteti Islamik, ISIS, në një operacion mbarëkombëtar kundër terrorizmit, njoftoi Ministria e Brendshme e vendit ditën e djeshme.

Sipas ministrit të Brendshëm, Ali Yerlikaya, operacioni është zhvilluar gjatë dy javëve të fundit në 47 provinca të Turqisë, përfshirë qytetet kryesore si Ankaraja, Stambolli dhe Izmiri.

Të dyshuarit akuzohen për përfshirje aktive në grupin, duke përfshirë financimin e ISIS-it dhe kryerjen e aktiviteteve propagandistike në emër të tij, tha ministri. Gjatë bastisjeve, policia sekuestroi disa pistoleta pa leje, dokumente organizative dhe materiale dixhitale, deklaroi Yerlikaya përmes një postimi në platformën sociale X.

Yerlikaya ndau gjithashtu foto nga operacionet. “Ne do të vazhdojmë përpjekjet tona pa ndërprerje për të siguruar paqen dhe sigurinë e qytetarëve tanë,” u shpreh ai.

Turqia e ka shpallur zyrtarisht ISIS-in si organizatë terroriste që prej vitit 2013, dhe që atëherë ka ndërmarrë një sërë operacionesh brenda dhe jashtë vendit për të luftuar këtë grup dhe rrjetet e tij.