Tragjedia në Maqedoninë e Veriut! Policët e dyshuar për licencën e diskotekës në Koçan para gjykatës

Në një zhvillim të fundit në Shkup, disa efektivë policie janë vënë nën akuzë për rolin e tyre në dhënien e licencës për diskotekën “Pulse” në Koçan, ku ndodhi një tragjedi e rëndë.

Një zjarr i përmasave shkatërruese përfshiu ambientet e diskotekës, duke shkaktuar vdekjen e 59 personave dhe plagosjen e shumë të tjerëve.

Policët e dyshuar akuzohen për miratimin e licencës së aktivitetit, pavarësisht se objekti nuk plotësonte standardet e sigurisë. Hetimet e deritanishme sugjerojnë se ata mund të kenë lejuar funksionimin e lokalit në kushte të pasigurta, të cilat mund të kenë ndikuar në përmasat tragjike të incidentit.

Autoritetet po zhvillojnë një hetim të thelluar për të zbardhur plotësisht rrethanat e ngjarjes dhe për të përcaktuar përgjegjësinë e të përfshirëve.

Ngjarja ka shkaktuar shqetësim të madh në publik, duke ngritur pikëpyetje mbi mbikëqyrjen dhe sigurinë e objekteve të eventeve te tilla. Në këtë kuadër, institucionet janë zotuar të sigurojnë një proces gjyqësor transparent dhe të drejtë.