Shkatërrohet grupi kolumbiano-shqiptar në Amsterdam, kishin laborator kokaine në katin e katërt të pallatit

Policia e Hollandës zbuloi një laborator droge në një kompleks apartamentesh mbi një qendër të kujdesit ditor në IJburg në Amsterdam muajin e kaluar, konfirmoi Shërbimi i Prokurorisë Publike (OM). Katër të dyshuar që u përpoqën të iknin përmes një ballkoni u arrestuan më pas, dhe një i dyshuar i pestë u kap të hënën.

Rasti është i pari në Holandë që konfirmohet të jetë i lidhur me një operacion ndërkombëtar që synon të godasë shërbimin e bisedës së koduar AN0M. Objekti që kishin marrë në përdorim u përdor si një fabrikë e përpunimit të kokainës. U gjet në katin e katërt të një ndërtese apartamentesh në lagjen e banimit.

Policia bastisi ndërtesën dhe kapi katër burra ndërsa përpiqeshin të arratiseshin. Burrat janë midis moshës 24 dhe 53 vjeç. Njëri është nga Amsterdami, dhe të tjerët janë nga vendet e Ekuadorit, Shqipërisë dhe Kolumbisë. Ata kanë qenë në paraburgim që nga arrestimi i tyre më 25 maj. Paraburgimi i tyre u zgjat me 90 ditë të tjera në sallën e gjyqit të Roterdamit këtë javë.

Brenda banesës, policia gjeti gjashtë kilogramë kokainë bazë në dollapët e kuzhinës dhe 13 kilogramë klorhidrat kokaine në kova të ndryshme përzierjeje. Kishte gjithashtu 360 litra kimikate, pajisje dhe mjete të përdorura për përpunimin e kokainës, tha OM. Gjithashtu u gjetën sende që përdoreshin për të formuar kokainën në blloqe.