Në gjendje të dehur dhunoi gruan dhe goditi djalin, arrestohet 43 vjeçari shqiptar në Itali

Një 42-vjeçar shqiptar është arrestuar në Itali, pasi dyshohet se ka sulmuar gruan e tij në vendin e saj të punës, një hotel pranë Riminit. Sipas hetimeve, gruaja ishte përballur prej vitesh me dhunë fizike dhe psikologjike, kërcënime dhe abuzime të lidhura me përdorimin e alkoolit nga bashkëshorti.

Ngjarja e fundit ndodhi në hotelin ku punonte gruaja. 42-vjeçari, i cili dyshohet se ishte në gjendje të dehur, u shfaq në vendin e punës së saj dhe i kërkoi para. Më pas, sipas rindërtimit të ngjarjes, ai e kërcënoi dhe e sulmoi.

Në mbrojtje të nënës ndërhyri djali 21-vjeçar i çiftit. Sipas mediave vendase, 42-vjeçari e goditi me grusht djalin e tij, duke shkaktuar një përleshje.

Situata u ndërpre pas mbërritjes së një patrulle të karabinierëve, të cilët ndanë babanë dhe djalin.

Pas ndërhyrjes, karabinierët zbuluan se episodi i fundit nuk ishte një ngjarje e izoluar.

Sipas hetimeve, prej vitit 2020 gruaja dyshohet se kishte qenë viktimë e vazhdueshme e fyerjeve, kërcënimeve me vdekje, dhunës fizike dhe psikologjike.

Abuzimi me alkoolin nga 42-vjeçari dyshohet se kishte ndikuar në përsëritjen e episodeve të dhunës.

Vetëm tre ditë para ngjarjes së fundit, ai dyshohet se kishte sulmuar sërish gruan. Ajo u detyrua të kërkonte ndihmë mjekësore në urgjencë, ku u trajtua dhe më pas u largua me një prognozë prej 30 ditësh.

Gruaja kishte pësuar edhe më herët një dëmtim në kokë. Megjithatë, nga frika e pasojave të mëtejshme, ajo kishte deklaruar në atë rast para stafit mjekësor se dëmtimi kishte ardhur si pasojë e një rënieje.

Duke marrë parasysh edhe precedentët e tij penalë, 42-vjeçari u arrestua.