Moti i keq në Greqi, meteorologët paralajmërojnë: Do zgjasë edhe disa ditë

Situata e motit në Greqi vijon të jetë e rënduar. Atika dhe Evia janë zonat më të prekura, ku dëmet materiale janë të shumta. Sipas mediave fqinje, në të paktën 2 ditë, 700 milimetra shi ka rënë, sa dyfishi i reshjeve vjetore në qendër të Athinës.

Banorët e Evias janë paralajmëruar se gjendja do jetë e tillë për disa ditë, ndërsa ky mot pritet të prekë edhe Traki, Thesalinë Lindore, Peloponez, Egje e Kretë, ndërsa ekziston dhe mundësia e breshërit. Përmbytjet e shkaktuara nga stuhia e mbiquajtur “Athina”, dëmtuan një sërë shtëpish, pronarët e të cilëve po kërkojnë ndihmën e shteti për të kapërcyer këtë moment të vështirë. Në disa raste, njerëzit i kanë gjetur në breg të detit orenditë e tyre, që ishin marrë me vete nga uji.

Banorët ankohen se zona në veri të ishullit nuk ishte fortifikuar, dhe thonë se pas zjarreve katastrofike të verës atje, nuk u bënë punimet e nevojshme për mbrojtjen nga përmbytjet. Sipas informacioneve, shtëpitë e dëmtuara në Evia, janë më shumë se 200. / Top Channel