Gjermania po fillon të marrë frymë, ulet numri i të infektuarve me Covid-19

Një lajm i mirë ka ardhur nga Ministria e Shëndetësisë gjermane, ku bëhet me dije se është shënuar ulje të numrit të rasteve me Covid-19. Sipas ministrisë, mesatarja 7-ditore e rasteve me koronavirus ra të enjten në 155 për 100,000 banorë, niveli më i ultë për këto dy javë. Në 24 orët e fundit, sipas autoriteteve, janë raportuar 24,736 raste të reja, gati 5,000 më pak se një javë më pare, dhe 264 viktima.

Hera e fundit kur kjo mesatare ka qenë nën 160, përkatësisht 153, ka qenë më 14 prill. Gjermania është duke luftuar për të frenuar valën e tretë të koronavirusit. Disa pjesë të këtij vendi janë futur nën izolim më të rreptë nga fundjava e kaluar.

Kujtojmë se kjo vjen pasi kancelarja Angela Merkel ka hartuar një legjislacion që i jep Qeverisë federale më shumë kompetenca, pasi disa nga 16 landet gjermane kanë refuzuar të miratojnë masa më të ashpra kundër koronavirusit. Legjislacioni i ri parasheh orën policore gjatë natës në qarqet ku rastet me koronavirus kalojnë shifrën 100 për 100,000 banorë, për tri ditë me radhë.

Rregullat e reja përfshijnë limite më të rrepta edhe për tubimet private. Shkollat duhet të mbyllen dhe mësimi të kalojë online nëse rastet me koronavirus kalojnë shifrën 165 për 100,000 banorë për tri ditë me radhë.