Arrestimi i pronarit të spitalit "Sante Plus", Bilal Karajt i konfiskohet pasaporta, si u "vodhën" qindra qytetarë

Mediat në Maqedoninë e Veriut kanë zbardhur të tjera informacione mbi arrestimin e biznesmenit Bilal Kara, i cili ishte shpallur në kërkim nga Shqipëria. 

Raportohet se pronari i spitalit privat “Sante Plus”, Bilal Kara, u arrestua mbrëmjen e djeshme pas aksionit të Ministrisë së Brendshme për abuzime financiare në operacionet e syve. Sot, pas një vendimi nga një gjyqtar në procedurë paraprake, i është konfiskuar edhe pasaporta, pasi ndaj tij është caktuar masa e sigurisë "ndalim për të dalë jashtë vendit". 

Së bashku me biznesmenin Kara, në pranga ka rënë edhe Geriana Arapi, ish-drejtoresha e spitalit. 

Në qendër të hetimit është një skemë e dyshuar faturimi të dyfishtë për operacionet e syve. Sipas policisë maqedonase, spitali përfitonte pagesa nga Fondi i Sigurimeve Shëndetësore për ndërhyrjet kirurgjikale, ndërkohë që pacientëve u kërkonte të paguanin përsëri privatisht për të njëjtat shërbime, pa i informuar se ato mbuloheshin nga fondi publik. 

Përveç punonjësve të Fondit të Sigurimeve Shëndetësore, u ndalua edhe pronari i Spitalit Kara, për të cilin Shqipëria lëshoi një urdhër arresti vitin e kaluar. Ai kërkohet nga vendi ynë me dyshimet për abuzime të kryera përmes klinikës private International Medicare, ish-Sante Plus, që ndodhet në Shqipëri.