Zjarret, ambasada në SHBA në mbështetje të Shqipërisë: Lutjet tona shkojnë për të prekurit

Prej ditësh zjarret në vend kanë krijuar një situatë të vështirë ndërsa sot është shënuar dhe viktima e parë. Së fundmi, reagon edhe ambasada e SHBA, e cila në një postim në Facebook shkruan se qëndron krah Shqipërisë në këtë situatë.

Ambasada amerikane ka publikuar edhe një video ku shihet një helikopter i  FA teksa merr ujë për të shuar flakët.

“Lutjet tona shkojnë për ata që janë prekur nga vatrat e zjarreve në Shqipëri. Shtetet e Bashkuara kanë qenë dhe do të qëndrojnë gjithmonë krah Shqipërisë në kohë nevoje. Në këtë video, burrat dhe gratë e guximshëm të Forcave të Armatosura Shqiptare përdorin pajisje të dhuruara nga Shtetet e Bashkuara ndërsa luftojnë me zjarret në jug të vendit.

Pajisjet për shuarjen e zjarrit janë pjesë e një dhurimi prej 360,000 dollarësh të bërë nga Komanda Europiane e Shteteve të Bashkuara në vitin 2019.

Ato përfshinin “kova Bambi”, kostume zjarrfikësish, sëpata, lopata dhe pajisje personale mbrojtëse. “Kovat Bambi”, të përdorura në këtë video, mbajnë ujë nëpërmjet helikopterëve dhe u mundësojnë atyre të mbushin sasi të mëdha në kohë të shkurtër, në mënyrë që të shuajnë zjarrin. #KrahPerKrah”, thuhet në mesazhin e ambasadës.