Vrasja e biznesmenit Remzi Hoxha mister, Artan Hoxha: Vdiq nga tortura, ja pse i zhdukën trupin

Zhdukja e Remzi Hoxhës, eshte risjelle ne vemendje pasi Bashkia e Tiranës dy ditë më parë vendosi që një rrugë të qytetit t’i vinte emrin e tij.

Zhdukja e tij është një rast ekstrem nga siguria e shtetit të asokohe. Kjo është ngjarja më e pazbardhur dhe trupi i tij nuk u gjend kurrë. Artan Hoxha i ftuar në këtë emision ka treguar se çfarë ka ndodhur në vitin 1995 kur biznesmeni u vra dhe arsyen pse.

Artan Hoxha: Kjo është një ngjarje shumë e rëndë, është një ngjarje që ka ndodhur para 29 vitesh, më 31 tetor të vitit 1995.

Po shkojë në tre dekada fiks, është ngjarja e një qytetari i cili ishte një biznesmen në atë kohë, u rrëmbye në mes të kryeqytetit, u provua që u rrëmbye nga skuadra operative e Shërbimit Informativ Kombëtar, SHIK-ut në atë kohë. U çua në bazën e SHIK-ut në Lezhë, u torturua aty dhe më pas kufoma e tij u zhduk.

Juli Xhokaxhiu: Kujt i interesonte zhdukja e Remzi Hoxhës për më tepër në këtë mënyrë dhe arsyet?

Artan Hoxha: Në atë kohë, Remzi Hoxha ishte një nga financuesit e lëvizjes guerile që po lindte në Kosovë.

Ishte marrë me këtë aktivitet në Kosovë, erdhi nga Kosova në Shqipëri me idenë për të qenë një korrdinator i lëvizjes guerile për ata që kishin probleme dhe i shpëtonin regjimit të Millosheviçit në Kosovë, strehoheshin në Shqipëri, pajiseshin me dokumente dhe shkonin drejt Europës.

Ata që vinin nga Kosova dhe kishin nevojë për mjekim ndihmoheshin nëpër spitalet e Shqipërisë etj. Biznesi që hapi ai duralumini ishte një mbulesë për aktivitetin që kryente Remzi Hoxha.

Ai u godit për këtë gjë, informacioni për përfshirjen e tij në aktivitet që mund të dëmtonte Republikën e Shqipërisë, është dhënë nga agjentët e shërbimit sekret serb. Në rastin më të mirë ka rënë në grackën në e dizinformacionit që janë dhënë nga shërbimet sekrete sërbe.

Do të ishte fatkeqësi e madhe që të mendojnë se kanë bërë në bashkëpunim me njëri-tjetrin. Një njeri që e kërkonin serbët, e zhdukin shqiptarët, kjo nuk ka sens.