Qëlloi 5 veta në Xhaminë e Tiranës, autori flet në gjykatë: Më përndiqnin, harrova të pija ilacet

Gjykata e Tiranes la ne qeli diten e sotme autorin e sulmit ndaj besimtareve ne xhamine e rruges se Kavajes ne Tirane ku u plagosen 5 persona.

Nga seanca për caktimin e masës së sigurisë për Rudolf Nikollin, i arrestuar për plagosjen 5 personave te xhamia “Dine Hoxha” në rrugën e Kavajës në Tiranë. Prokuroria ka ngritur akuzë për “vepra për qëllime terroriste”.

“I arrestuari ka hyrë në ambientet e xhamisë dhe me një thikë ka goditur disa besimtarë.

Menjëherë pas kësaj ai ka tentuar të largohet, por me ndërhyrjen e disa qytetarëve dhe më pas policisë, është ndaluar. Ngjarja është filmuar dhe nga kamerat e xhamisë.

I arrestuari në dëshminë e tij ka shpjeguar se ditën e ngjarjes ka hyrë në xhami dhe ka qëlluar personat.

Ai ka dhënë si aresye faktin se prej disa kohësh disa myslimanë e përndiqnin. Kur dilte nga shtëpia ata e shikonin.

Është shkuar në spitalin psikiatrik ku është marrë kartela e tij. Është marrë dhe vendim për aktekspertim mendor ndaj tij. Veprimet e Nikollit kanë përhapur panik në popullatë”.

Avokati pohoi se Nikolli ka pasur probleme të shëndetit mendor. “Vendosja e një mase arresti është e papërshtatshme. Masa duhet të jetë me afat, deri në daljen e aktit të ekspertimit”.

Autori i dyshuar i ngjarjes përsëriti edhe njëherë tjetër se është ndjekur prej kohësh, ndërsa thekson se i njeh ata persona.

“Fakti që jam përndjekur është e vërtetë. Unë i njoh me fytyra. U bë gati një vit. Edhe shteti besoj se është në dijeni për këtë gjë.

Unë nuk desha të bëj atë që bëra. Por ata më kanë ndjekur. Ilaçet i kam marrë, por kishte raste që i harroja”, tha Nikolli.