Prej një viti pa urë, izolohen 70 banorë në Shishtavec të Kukësit

Kushtet e rënduara atmosferike dhe dimri e bëjnë jetën edhe më të vështirë, kryesisht për banorët e fshatrave të thella malore. 

Banorët e lagjes Gjuta në Shishtavec të Kukësit, si pasojë e përkeqësimit të kushteve atmosferike, rrezikojnë jetën çdo ditë duke kaluar mbi një urë provizore, e ndërtuar pas shkatërrimit të urës ekzistuese.

Mungesa e urës dhe rreziku që kanoset gjatë kalimit mbi të ka penguar shkollimin e 10 nxënësve të kësaj zone, të cilët duhet të udhëtojnë më shumë se 30 minuta drejt shkollave të fshatrave Shishtavec dhe Novosej.

Izolimi është bërë i zakonshëm sa herë që ka reshje. Mes thirrjeve për ndihmë, banorët kujtojnë edhe premtimin e pambajtur për rindërtimin e urës, e cila u shkatërrua një vit më parë.

Banorët e lagjes Gjuta në fshatin Shtrezë të Shishtavec shpresojnë në rikthimin e vëmendjes ndaj tyre, teksa ura e sajuar mbetet e vetmja rrugë kalimi, jo vetëm për jetën e përditshme, por edhe për raste urgjencash apo humbje jete në këtë zonë të thellë malore.