“Kam qenë për 40 ditë me radhë në protestë”/ Aktivisti: Rama e ka kaluar paranojën e Enver Hoxhës, me agjenturat dhe ..

Protesta masive kundër qeverisë ka hyrë në ditën e saj të 40-të radhazi të qëndresës qytetare.

Qytetarët kanë nisur grumbullimin e tyre në sheshin “Skënderbej” në kryeqytet, duke treguar një vendosmëri të palëkundur për të çuar deri në fund kauzën e tyre.

Në një prononcim të dhënë direkt për mikrofonin e News24 nga sheshi, një aktivist i cili ndodhet në ballë të kësaj lëvizjeje që nga momenti i parë, ka deklaruar se asnjë pengesë, qoftë edhe atmosferike, nuk do t’i ndalë njerëzit e thjeshtë. “Kam qenë për 40 ditë me radhë në protestë. Protesta po zhvillohet në kushte edhe të vështira atmosferike, por qytetarët nuk do ndalojnë,” u shpreh ai, duke vënë theksin te vullneti i hekurt i pjesëmarrësve.

Më tej, aktivisti u ndal te ajo që e konsideroi si problemin më të madh të javëve të fundit: sulmet dhe gjuha denigruese e përdorur nga radhët e mazhorancës socialiste, duke bërë një paralele të frikshme me periudhën më të errët të diktaturës komuniste në Shqipëri.

“Më shumë problem se vapa është gjuha denigruese e kryeministrit, ministrave e eksponentëve të tjerë të PS. Është një zhargon që nuk e shihnim prej dekadash me armiq, agjentura, etj. Përgjatë diktaturës së Enver Hoxhës kishte 4 agjentura në kulmin e paranojës, ndërsa sot po thonë edhe më shumë agjentura,” denoncoi ai në studio.

Në mbyllje të fjalës së tij, aktivisti kritikoi ashpër faktin se qeveria po sulmon madje edhe vëllezërit shqiptarë nga rajoni që kanë ardhur për të mbështetur kauzën e tyre mjedisore dhe politike. “Edhe bashkëkombësit tanë në trojet etnike shqiptare po i konsiderojnë si agjentura. Pavarësisht shpifjeve e baltës, qytetarët vijojnë të dalin dhe kanë një vullnet të jashtëzakonshëm,” përfundoi aktivisti për News24, teksa turma në sheshin “Skënderbej” po shtohet nga minuta në minutë.